د طالبانو د بهرنیو چارو وزارت ویلي، د اسحاق ډار وروستۍ څرګندونې چې ګواکې د طالبانو د بهرنیو چارو وزیر امیرخان متقي له نوموړي سره په یوه ورځ کې شپږ ځله اړیکه نیولې؛ له واقعیت څخه لرې دي او د دواړو هېوادونو ترمنځ د متقابل درناوي او د ډیپلوماټیک تعامل اصولو خلاف دي.
د طالبانو د کورنیو چارو وزارت خبر ورکړی، چې ځواکونو یې په بېلابېلو عملیاتو کې په هرات، فراه، فاریاب، کندوز او لغمان ولایتونو کې ۱۷ کسان د غلا او عامه نظم ګډوډولو په تړاو نیولي دي.
د افغانستان لپاره د ملګرو ملتونو سازمان د ځانګړې استازې مرستیال ښاغلي اندریکا راتوت په غور ولایت کې د شاوخوا ۹۰۰ کلن پخواني جام منار څخه لیدنه کړې او ټینګار یې کړی، چې نړۍواله ټولنه باید د دغه تاریخي میراث د ژغورنې لپاره سملاسي اقدام وکړي او د لهمنځه تلو مخه یې ونیسي.
د ملګرو ملتونو د استوګنې ادارې (UN-Habitat)استازې سټیفني لوس په افغانستان کې د زیانمنو کورنیو د ملاتړ لپاره د دوامداره مرستو غوښتنه کړې ده. هغې ویلي:« اقلیمي بدلون موږ ټول اړ باسي، چې سملاسي اقدام وکړو؛ څو کورنۍ وکولای شي خوندي ژوند ولري او راتلونکی یې پیاوړی شي.»
په هرات ولایت کې د طالبانو د امر بالمعروف، نهې عن المنکر او د شکایتونو اورېدو رییس عزیز الرحمان مهاجر ویلي، چې د یاد ولایت له ښار څخه ۷۵۰ رواني ناروغان راټول او د درملنې لپاره د افغاني سرې میاشتې ټولنې ته سپارل شوي دي.
د ایران د ښوونې او روزنې وزارت تازه خپلو ادارو ته سپارښتنه کړې، چې په هېڅ صورت کې باید د کډوالو ماشومانو او په ځانګړې توګه د افغان کډوالو د زدهکړې لړۍ ونه درېږي. دغه وزارت خپلو څلورو ولایتونو ته امر کړی، چې له زدهکړو پاتې کډوال ماشومان دې بېرته ښوونځیو کې شامل کړي.
د «اېر بریج کابل» مرستندویه شبکې چارواکو ویلي، د جرمني حکومت هغو افغان کډوالو ته چې د بیامېشتېدو پروګرام په چوکاټ کې پاکستان ته انتقال شوي وړاندیز کړی چې که له دغه پروګرام نه لاس واخلي؛ نو مالي مرستې او نور امتیازات به ترلاسه کړي.
د طالبانو د صنعت او سوداګرۍ وزارت وایي، د افغانستان او پاکستان ترمنځ د ټرانزیټي لارو له تړل کېدو وروسته د افغان سوداګرو نږدې ۸زره د توکو وړونکي کانټینرونه د پاکستان په بندرونو کې بند پاتې دي.
د بېپولې خبریالانو سازمان وایي، د طالبانو استخباراتي اداره د افغان خبریالانو د اجباري اعترافونو په خپرولو سره هغوی تحقیر او سپکوي. د دې ادارې یوې مسوولې سېلیا مرسیه ویلي، چې د طالبانو هدف دا دی چې خبریالان مجرم وښيي او د هغوی نیول توجیه کړي.
په جلا وطنۍ کې د افغانستان د ازادو رسنیو د ملاتړ بنسټ (نی) په پاکستان کې د مېشتو خبریالانو د نیولو او شړلو په غبرګون ویلي، چې افغانستان ته د خبریالانو په ځانګړي ډول د ښځینه خبریالانو بېرته ستنول خطرناک دی.
د طالبانو د المپیک، بدني روزنې او سپورټ لوی رییس وایي، د عزیزي سوداګریز ګروپ مشر میرویس عزیزي د افغانستان ۱۷ کلنه فوټسال ملي لوبډله د یوې غونډې پر مهال وستایله او د یو میلیون افغانیو جایزه یې هم ورکړه.
ایراني چارواکي وایي، د چابهار بندر له لارې هر کال له شپږ میلیون ټنو څخه ډېر توکي تخلیه او بارېږي. د شهید بهشتي بندر په سیمه کې د غلو د زېرمو، ګدامونو او د تېلو د زېرمتونونو جوړولو سربېره د پټلۍ او سړکونو پراختیا د دې بندر د اهمیت کچه لا لوړه کړې ده.
د پاکستان د بهرنیو چارو وزیر د دې هېواد په سنا کې وویل، د طالبانو د بهرنیو چارو وزیر امیرخان متقي د دوشنبې په ورځ له ده سره شپږ ځلې ټلیفوني اړیکه نیولې ده. اسحاق ډار په خپلو خبرو کې ویلي، متقي ته یې په ښکاره وویل: «ستاسو خاوره باید د پاکستان پر ضد و نه کارول شي.»
سرچینې وايي، د ایاېسای مشر عاصم ملک به په استانبول کې له طالب پلاوي سره د خبرو د درېیم پړاو پر مهال د خپل پلاوي مشري وکړي. ټاکل شوې ده، چې دا خبرې د پنجشنبې په ورځ (د نومبر ۶مه) په ترکیه کې پیل شي او کوربه هېواد ترکیه به له قطر سره یو ځای د منځګړیتوب رول ولوبوي.
په کابل کې د ایران سفارت ویلي، چې د افغانستان د شمال زلزلهځپلو لپاره یې خپله لومړنۍ مرسته لېږلې ده. دغه سفارت د سېشنبې په ورځ پر خپلې اېکس پاڼې لیکلي، چې په دې مرستو کې درمل او خیمې شاملې دي.
د طالبانو د تخنیکي او مسلکي زده کړو عمومي رییس ویلي، چې د نوې طرحې له مخې د ټول هېواد په کچه نږدې ۴۰ زره طالبان په مدیریتي زده کړو بوخت دي. نوموړي په تخار کې د ادارې او مدیریت زده کړو څخه د ۵۸۰ طالبانو د فراغت په مراسمو کې وویل، چې ددې ډلې مشر د یادې طرحې تود هرکلی کړی.
د طالبانو د بلخ ولایت چارواکي وايي، د ازبکستان د سرخان دریا والي اولغ بېک قاسموف د دې ډلې د بلخ والي محمد یوسف وفا سره په کتنه کې ویلي، چې دوی د افغانستان د ټولو تازه مېوو پېرلو یا نورو هېوادونو ته استولو ته چمتو دي.
د افغانې خبریالې فاطمه همنوا نږدې خپلوانو افغانستان انټرنشنل – پښتو ته ویلي، چې نن له غرمې وروسته پولیسو د اسلام اباد له «بي – ۱۷» ښارګوټي څخه نوموړې له خپلو دوو کوچنیو اولادونو سره یو ځای نیولې ده.
د جرمني د کورنیو چارو وزیر الکساندر دوبریندټ غواړي هغو افغانانو ته چې د جرمني د دولتي پروګرام له لارې د خونديتوب له حق نه لاس اخلي، د پیسو او توکو په بڼه مرسته ورکړي. د دغه اقدام هدف دا دی چې اسلام اباد میشتي افغانان برلین ته د تګ له غوښتې تېر شي.
د طالبانو تر واک لاندې د افغانستان برېښنا شرکت اعلان کړی چې د ازبکستان وارداتي برېښنا مزي، چې د وروستۍ زلزلې له امله پرې شوې وو، د تخنیکي کارکوونکو په هڅو بېرته نښلول شوي دي.
د ترکمنستان د بهرنیو چارو مرستیال وزیر احمد قربانوف وايي، چې عشق اباد په افغانستان کې د اوږدمهاله بشري او ټولنیزو مرستو پروژې په دوامداره توګه عملي کوي. نوموړي له افغان زلزله ځپلو سره د مرستې لپاره چمتووالی ښودلی.
د هند حکومت د دوشنبې ورځې تر مرګونې زلزلې وروسته د طالبانو تر واک لاندې افغانستان ته د بشري مرستو د زیاتوالي هڅې پیاوړې کړې او ځان یې د سیمهییزو ناورینونو د «لومړني ځواب ویونکي» په توګه معرفي کړی. دا ګام د چین له هڅو سره د مقابلې لپاره اخیستل شوی چې غواړي د لوېدیځ تشه ډکه کړي.